Ш. Зуҳуров: « Тоҷикистон Русияро муҳимтарин шарики стратегии худ медонад»

Ш. З. Муҳимтарин масоили марбут ба тавсеаи равобити ҳасанаи Душанбеву Маскав дар ҷараёни мулоқоти Шукурҷон Зуҳуров-раиси Маҷлиси намояндагони Маҷлиси Олии Ҷумҳурии Тоҷикистон бо Сергей Наришкин-раиси Думаи давлатии Маҷлиси Федеролии Федератсияи Русия дар дар шаҳри Санкт-Петербург матраҳ гардиданд.

Назар ба иттилои Муҳаммадато Султонов-котиби матбуотии Маҷлиси намояндагон мусоҳибон ҳамзамон масоили тақвияти ҳамкориҳои байнипарлумонӣ, иқтисодӣ,

кишоварзӣ, энергетика, маориф, муҳоҷират ва муборизаи муштарак бар зидди падидаҳои номатлуб, инчунин таҳкими муносиботи дуҷониба дар доираи созмонҳои мухталифи минтақавию байналмилалиро баррасӣ намуданд. Зикр шуд, ки парлумонҳои Тоҷикистону Русия ҷиҳати ба роҳ мондани фаъолият дар бахшҳои зикргардида заминаи ҳуқуқӣ эҷод мекунанд.

Шукурҷон Зуҳуров тавсеаи ҳамкориҳои Маҷлиси намояндагон бо парлумонҳои кишварҳои мутараққии ҷаҳон, аз ҷумла Русияро яке аз комёбиҳои парлумони касбии Тоҷикистон дар арсаи байналмилалӣ арзёбӣ намуд. Мавсуф зикр кард, ки Маҷлиси намояндагон дар самти фаъолияти худ таҳкими ҳамкориҳоро бо Русия дар тамоми соҳаҳо меҳвари асосӣ қарор додааст.

Зикр гардид, ки асоси робитаи ҳасана байни Маҷлиси намояндагони Маҷлиси Олии Ҷумҳурии Тоҷикистон бо Думаи давлатии Федератсияи Русия аз муносибати хуби сарони ҳарду давлати дӯст сарчашма мегирад. Шукурҷон Зуҳуров аз дастгирӣ ва пуштибонии Русия аз мавқеи Тоҷикистон дар миқёси байналмилалӣ изҳори қадрдонӣ намуда, гуфт, ки Тоҷикистон Русияро муҳимтарин шарики стратегии худ дар сатҳи ҷаҳонӣ медонад ва барои тавсеаи равобит бо ин кишвари абарқудрати дунё дар тамоми соҳаҳо манфиатдор аст.

Сергей Наришкин -риси Думаи давлатии ба сатҳи ҳамкориҳои кишвараш бо Тоҷикистон дар тамоми соҳаҳо, бахусус равобити байнипарлумонӣ баҳои баланд дод. Вай гуфт, ки байни Русия ва Тоҷикистон дар самти тақвияти ҳамкориҳо ва равобити байнипарлумонӣ ягон монеа вуҷуд надорад. Зикр шуд, ки сафари ахири Владимир Путин -Президенти Русия ба Тоҷикистон ба густариши минбаъдаи равобити судманди ду кишвари дӯст такони ҷиддӣ бахшид. Мусоҳибон роҷеъ ба паҳлуҳои дигари равобити судманди Душанбеву Маскав ва авзои минтақа табодули назар карданд. Дар анҷоми мулоқот Сергей Наришкин аз ҳамтои тоҷики худ Шукурҷон Зуҳуров даъват ба амал овард, ки дар фурсати барояш муносиб бо сафари расмӣ аз Русия боздид намояд. Ин даъват бо самимият пазируфта шуд.

Back to Top